Ном зүй (хуудас 215)

БҮРГЭД ном нь "Шувуучлахуйн уламжлалт зан үйл" - Хүн төрөлхтний соёлын биет бус өв болох "Бүргэдээр ан хийлгэх амьд уламжлал" - ыг тээн яваа монголын казахуудын соёл, амьдрал мөн монголын аялал жуулчлалын томоохон арга хэмжээ болох "Бүргэдийн наадам" зэргийг харуулсан сонирхолтой гэрэл зургууд, бүргэдчидийн ярилцлага, танин мэдэхүйн бичвэр, инфографик бүхий 216 хуудас бүхий гэрэл зураг танин мэдэхүйн бүтээл бөгөөд мөн (National Geographic) нэрийн дор гарчээ.

Бүргэдээ суулгасан казах морьтнууд, тэнгэр хоёрын хооронд сүрлэг Алтайн уулс сүндэрлэн цайрах агшин бол гэрэл зургийн урлагт тэр бүр тохиолдохгүй гайхалтай хослол юм. Төв Азийн нүүдэлчин түмний улбаа, монголын казахууд шувуучлах уламжлалт соёлыг өнө эртнээс нааш уламжлалт хэлбэрээр нь хадгалж, эргэх цагийн аяст аж амьдрал, ахуй соёлтойгоо хослуулан тээсээр буй дэлхий дээрх цөөн үндэстний нэг билээ.
Түүхийн эх сурвалжуудад тэмдэглэснээр тэртээ 6000 жилийн өмнөөс шувуугаар ан хийлгэж байсан тухай баримтаас үзэхэд бүргэд шувуу хүн хоёрын нөхөрлөл, хүчирхэг жигүүртэн, хүлэг морьдын холбоо, хүсэл, хяслын хязгаар, хүй орчлон хүмүүний хамаарал, хөгшидөө хүндэтгэх адил айл гэрийн бахархалт энэ өвөрмөц зан үйл, ёс уламжлал өнөөг хүртэл хэрхэн хадгалагдан ирэхдээ юу эсийг давж, хичнээн удмыг дамжиж, хэлбэр, жаягаа гээлгүй тээснийг зөвхөн казах үндэстэн өгүүлэх бизээ.
Өдгөө манай орны алс баруун хязгаар, Алтай Соёны уулсын дунд 200 гаруйхан бүргэдчин гайхамшигт язгуур соёлоо бодитоор тээж, үе удам, үр хойчдоо өвлүүлсээр амьдран суух юм...
Эрхэм нандин өв соёлоо сурталчлан таниулах үйлст хамтдаа зүтгэж буй уран бүтээлийн хамтрагчид, гэрэл зурагчид, эртний шувуучлах уламжлалын үргэлжлэл, бүргэдийн соёлыг илтгэн харуулсан шилдэг зургуудаа сонгон сойж, тайлбар юугаа бичиж, тоон мэдээллээ тоймлохдоо тэрхүү соёлыг тээгч бүргэдчин казахуудтай ярилцлага дурсамжаар баяжуулан бүтээлээ бадраан, хөгжүүлэхийг энэхүү номоороо үзүүлэхийг хичээжээ.

Монгол Кирилл